На прыпынку пасажырскага транспарту “Юркавічы”, размешчанага ў аднайменнай вёсцы Лагойскага раёну, на баку рэспубліканскай дарогі Р-3 у накірунку Лагойска, на сядзенні лаўкі не хапае дзьвух дошак з чатырох (фота прыкладаюцца да зварота).

Фактычна палова плошчы сядзення адсутнічае, што не дазваляе паўнавартасна карыстацца лаўкай і робіць чаканне транспарту на прыпынку некамфортным. У такім стане прыпыначны павільён знаходзіцца даволі доўгі тэрмін, як мінімум з сярэдзіны 2021 г.

Па стане на канец красавіка 2022 г., бачна, што павільён нанова пафарбаваны, але лаўка чамусьці пакінута ў ранейшым, паламаным стане.

У адпаведнасці з патрабаваннямі Будаўнічых нормаў 3.03.04-2019 «Аўтамабільныя дарогі» пп.10.1.2 п.10.1 "Прыпыначныя пункты маршрутнага пасажырскага транспарту": прыпыначныя пункты маршрутнага пасажырскага транспарту павінны быць абсталяваны прыпыначнымі і пасадачнымі пляцоўкамі, павільёнамі або навесамі для чакання транспарту пры неабходнасці, лавамі.

Згодна з Класіфікацыяй работ па эксплуатацыі (утрыманні і бягучым рамонце) аўтамабільных дарог, зацверджанай пастановай Міністэрства транспарта і камунікацый ад 19.06.2019 №35, названыя работы ўключаюць у сябе рамонт і замену дэфектных лаваў на прыпыначных пунктах маршрутнага пасажырскага транспарту.

На падставе выкладзенага просім прыняць меры па рамонце або замене дэфектнай лаўкі на прыпынку “Юркавічы” (у бок Лагойска).