Патрабуем адстаўкі А.У.Ягорава, рэктара ВДУ ім. Машэрава

21.02.2019 ва ўсім свеце адзначалі Дзень роднай мовы. З глыбокім абурэннем паведамляем, што ў Віцебскім дзяржаўным універсітэце імя Машэрава, які знаходзіцца ў Беларусі і рыхтуе педагагічныя кадры для мясцовых, беларускіх школ, цэлы тыдзень праводзіліся мерапрыемствы ў гонар "родного русского языка". Іх праводзілі супрацоўнікі філалагічнага факультэта пры падтрымцы фонду "Русский мир", які дзейнічае ў Расіі і займаецца прапагандай рускай мовы і традыцый рускага народу. Несумненна, гэта рабілася са згоды рэктара ВДУ Аляксея Ягорава.

А.У.Ягораў мае юрыдычную адукацыю, і таму ён не мог не разумець, што прапаганда мовы суседняй дзяржавы ў Дзень роднай мовы - гэта дэманстрацыя антыпатрыятычных настрояў, якія, атрымліваецца, пануюць у падпарадкаванай яму вышэйшай навучальнай установе.

У гэты дзень шматлікія арганізацыі і ўстановы Рэспублікі Беларусь ладзілі імпрэзы, прысвечаныя роднай беларускай мове. Дзень роднай мовы стаў нацыянальным святам у працоўных, студэнцкіх, вучнёўскіх калектывах, і людзі падчас імпрэзаў у гонар беларускай мовы адчувалі сябе сапраўднымі патрыётамі, навучаліся ганарыцца гісторыяй і культурай Беларусі, аддавалі даніну памяці продкаў, якія ў войнах і нягодах здабылі сенняшнюю незалежнасць Рэспублікі Беларусь. І толькі віцебскі ўніверсітэт зняславіў сябе на ўсю краіну тым, што змусіў выкладчыкаў і студэнтаў услаўляць чужую мову замест роднай.

Яшчэ раз звяртаем Вашу ўвагу на тое, што ВДУ імя Машэрава рыхтуе настаўнікаў для беларускіх школ, і больш за 80% тутэйшых студэнтаў - гэта выхадцы з вёсак і райцэнтраў Віцебскай вобласці або жыхары абласнога цэнтру. Услаўленне рускай мовы ў якасці роднай у беларускай ВНУ мы расцэньваем не інакш як здзек над патрыятычнымі пачуццямі беларускага народу, як абразу нацыянальнай годнасці беларусаў.

Без сумневу, частка насельніцтва Беларусi мае права лічыць роднай мовай рускую, і навучальныя ды культурніцкія імпрэзы, прысвечаныя любым мовам свету, - гэта пазітыўная з'ява. Аднак у Дзень роднай мовы пашана павінна аддавацца менавіта ёй, а не асабістым памкненням некаторых супрацоўнікаў універсітэта лішні раз прадэманстраваць сваю адданасць "русскому міру" у любых яго праявах.

Мы патрабуем адстаўкі рэктара ВДУ імя Машэрава Ягорава А.У., са згоды якога праводзіліся імпрэзы, скіраваныя, на нашу думку, супраць суверэнітэту Рэспублікі Беларусь, і якія супярэчаць патрыятычнай плыні ідэалагічнага выхавання ў нашай краіне, рыхтуюць глебу для дэстабілізацыі ў грамадстве.

Патрабуем таксама забараніць умяшанне замежных грамадскіх арганізацый і фондаў ва ўнутранае жыццё беларускіх навучальных установаў; патрабуем забараніць размяшчэнне офісаў замежных урадавых і няўрадавых арганізацый на тэрыторыі беларускіх устаноў адукацыі.

Мы хочам, каб у нашых ВНУ выхоўваліся сапраўдныя патрыёты Беларусі, а не касмапаліты з няўцямнымі поглядамі на ідэалагічна важныя складнікі грамадскага жыцця.