Прапановы да свята ў Бялынічах не разгледжаны належным чынам.

09 сакавіка 2020 мною атрыманы адказ на электронны зварот (копія прыкладаецца). Дадзены адказ, на мой погляд, не адпавядае патрабаванням заканадаўства ў частцы поўнага, усебаковага і аб'ектыўнага разгляду зваротаў і накіравання матываваных і абгрунтаваных адказаў грамадзянам па наступных прычынах:

Па-першае, вельмі падазрона выглядае той факт, што Бялыніцкі райвыканкам быццам бы не атрымаў прапановы ў час грамадскага абмеркавання, а таму ўсе прапановы ў праекце рэканструкцыі ўлічаны не будуць (вельмі зручна).

Па-другое, у парушэнне арт. 18 Закона "Аб зваротах грамадзян и юрыдычных асобаў" адказ дадзены не на мове звароту (беларускай).

Што тычыцца адказаў па пунктах:

Няма адказу наконт правядзення археалагічных даследванняў і магчымасці выяўлення абрысаў кармеліцкага касцёла і Раства-Багародзіцкай царквы ў добраўпарадкаванні. Калі касцёл будзе адзначаны памятным знакам, то наконт царквы нічога не гаворыцца;

Няма адказу на прапанову аб стварэнні муралаў з фрэскамі;

Няма адказу на прапанову аб беларускамоўных шыльдах і беларускамоўным афармленні свята ні слова;

Няма адказу наконт прысваення новых назваў плошчам і скверу ў горадзе;

Нягледзячы на тое, што ў адказе адзначалася, што перанос помніка Леніну на іншы бок вуліцы прыняты без заўваг райсаветам, не прыведзена абгрунтаванне гэтага рашэння з пункту гледжання архітэктурнай кампазіцыі і марнавання бюджэтных сродкаў. Не думаю, што сярод раённых дэпутатаў ёсць кампетэнтныя ў архітэктуры людзі. З пункту гледжання эканоміі дзяржаўных грошай гэтак жа больш эканомнай з’яўляецца прапанова аддаць пад веларух бакавыя палосы праезнай часткі, а не знішчэнне зеляніны і завужэнне ходнікаў.

Прашу забяспечыць належны разгляд звароту.