Новым вуліцам Драгічына — беларускія назвы!

У сувязі з правядзеннем грамадскага абмеркавання наконт прысваення найменняў элементам вулічна-дарожнай сеткі горада Драгічына ў квартале індывідуальнай жылой забудовы ў граніцах вуліц Леніна, Брэсцкая, Бялова паведамляем наступнае.

Прыведзеныя назвы пасавалі б якой расійскай глыбінцы, да прыкладу, Вятцы ці Рыбінску, але не старажытнаму беларускаму паселішчу.

Адкуль магла ўзяцца ідэя вуліцы Маскоўскай, калі сталіца радзімы - Мінск, сталіца вобласці - Брэст, а найбліжэйшыя буйныя гарады - Кобрын і Пінск? Масква ж размешчана за 1000 км і нават не з’яўляецца горадам-пабрацім Драгічына.

Якое дачыненні да Драгічына мае расійскі военачальнік Пётр Баграціён? Ён удзельнічаў ва ўзброеным захопе беларускіх зямель у час другога падзелу Рэчы Паспалітай, а таксама ў здушэнні паўстання Касцюшкі. У час руска-французскай вайны 1812 года ён адступаў ад Гродна да Магілёва ды Смаленска і загінуў у тым жа годзе на Барадзінскім полі. Не ўяўляецца магчымым, каб шлях яго адступлення пралягаў праз Драгічын. Перамога Расіі ў вайне з Напалеонам не прынесла Беларусі ніякіх выгод.

Не зразумела таксама, чаму прапанава постаць савецкага маршала Георгія Жукава, які кіраваў летам 1944 года 1-м і 2-м Беларускімі франтамі, калі не ўшанаваны непасрэдныя вызваляльнікі горада - 12-я гвардзейская стралковая дывізія, 212-я стралковая дывізія, 415-я стралковая дывізія 61-й арміі?

Ніяк з Драгічынам не звязаны расійскі жывапісец Іван Айвазоўскі: ён тут не нарадзіўся, не жыў, не спыняўся, не маляваў краявіды — дык за што такі гонар?

Але галоўнае пытанне — чаму ў прапанаваных назвах няма анічога беларускага?

Між тым Драгічыншчына парадзіла няма славутых людзей, імёны якіх вартыя ўшанавання ў назвах вуліц:

*Севярын Віславух (1900—1968) — гісторык. Нарадзіўся ў Пярковічах. Вывучаў гісторыю Вялікага Княства Літоўскага, шляхі зносін. Даследаваў сацыяльную структуру, землеўладанне, рэлігійныя адносіны, працэсы русіфікацыі і паланізацыі ў Заходняй Беларусі, дзейнасць КПЗБ. Крытыкаваў польскую палітыку асіміляцыі, выступаў у друку ў абарону беларускай культуры, выкладаў гісторыю ў беларускіх школах.

*Сігізмунд Карлавіч Свянціцкі (1836—1910) — беларускі лекар, адзін з заснавальнікаў унутрыполасцевай хірургіі на Беларусі. Нарадзіўся ў Красцінаве.

*Анатоль Ільіч Зосік (1924—2003) — Поўны кавалер ордэна Славы. Нарадзіўся ў Закозелі.

*Ала Канстанцінаўна Кабаковіч (1943—1985) — беларускі літаратуразнавец, крытык, паэтэса, перакладчык. Нарадзілася ў Гутаве. Жонка пісьменніка Міхася Тычыны.

*Фёдар Данілавіч Клімчук (1935—2018) — беларускі мовазнаўца-дыялектолаг, гісторык. Нарадзіўся ў Сіманавічах.

*Уладзімір Уладзіміравіч Кожух (1953—2017) — беларускі мастак. Нарадзіўся ў Драгічыне.

*Васіль Андрыянавіч Літвінчук (1930—2020) — беларускі празаік, рэдактар. Нарадзіўся ў Галіку.

*Якаў Сямёнавіч Малайчук (1944—2015) — беларускі харавы дырыжор, краязнаўца. Нарадзіўся ў Дзераўной. Заснавальнік адзінага на Беларусі музея Рыгора Шырмы.

*Сяргей Канстанцінавіч Паўловіч (1875—1940) — беларускі педагог, публіцыст, грамадскі і культурны дзеяч. Нарадзіўся ў Восаўцах. Адзін з кіраўнікоў Таварыства беларускай школы. У 1925—1928 настаўнік і дырэктар Віленскай беларускай гімназіі.

*Аркадзь Фядосавіч Рылюк (1934—2014) — беларускі хірург, вучоны, доктар медыцынскіх навук, прафесар. Нарадзіўся ў Ліпніках.

*Уладзімір Мікалаевіч Сітуха (1950—2014) — журналіст, паэт, празаік, дзіцячы пісьменнік. Нарадзіўся ў Гутаве.

*Мікалай Мікалаевіч Федзюковіч (1943—1997) — беларускі паэт, перакладчык. Нарадзіўся ў Гутаве.

*Майсей Калінікавіч Юскавец (1898—1969) — беларускі вучоны ў галіне ветэрынарыі. Акадэмік АН БССР і Акадэміі сельскагаспадарчых навук БССР, доктар ветэрынарных навук, прафесар. Заслужаны дзеяч навукі БССР. Нарадзіўся ў Завершы.

Не ўшанаваны таксама род Нявельскіх, які заснавалі ў Драгічыне царкву Прачыстай Багародзіцы і атрымаў для яго статус мястэчка.

Просім выбіраць для назваў вуліц у Драгічыне імёны, звязаныя з краем, а не выдзіраць выпадковых асоб з расійскага пантэона.