Уратуем Нараўлянскі палац

Начальніку аддзела ідэалагічнай работы,

культуры і па справах моладзі

Нараўлянскага раённага выканаўчага камітэта

Рудкоўскай Іне Адамаўне.

Мы, грамадзяне Рэспублікі Беларусь, вельмі занепакоены тым станам, у якім апынуўся палаца-паркавы ансамбль Горватаў у горадзе Нароўля (гісторыка-культурная каштоўнасць рэспубліканскага значэння, шыфр 312Г000536).

У выніку бяздзеяння і адсутнасці дбайнага гаспадара будынак палаца амаль цалкам страціў дах, што прывяло да катастрафічных наступстваў: разбурылася перакрыццё паміж паверхамі і пачалі руйнавацца сцены. Гэта стала заўважна асабліва цягам апошняга года.

На падставе арт. 41 Закона "Аб мясцовым кіраванні і самакіраванні», якi ўсталёўвае, што выканкамы праводзяць мерапрыемствы па ахове гісторыка-культурнай спадчыны, просім вас як адказную асобу неадкладна прыняць меры і прывесці будынак палаца ў належны стан, а пры адсутнасці фінансавай магчымасці ўтрымоўваць помнік архітэктуры на балансе аддзела - выставіць яго на аўкцыён з паніжэннем стаўкі да адной базавай велічыні для таго, каб перадаць адказнасць за захаванне помніка архітэктуры іншай арганізацыі ці фізічнай асобе.